ပြည် အောင်လံ သရက်
၁၃ရက် ၊သောကြာ ညနေ ၇ နာရီခန့်။
သရက်ကို သွားပြီး ကိုမင်းကိုနိုင်လွတ်မြောက်တဲ့ သတင်း သွားယူနိုင်မလားတဲ့။ ဟုတ်ကဲ့ အခုသွားလိုက်ပါမယ်ဆိုပြီး ကင်မရာအိတ်ထဲကို ပစ္စည်းတွေ စစ်ပြီး ထည့်။ အောင်မင်္ဂလာ အဝေးပြေးကို တက္ကစီနဲ့ ပြေးပါတယ်။ တက္ကစီမောင်းတဲ့သူက ကားတွေ ၁၀ နာရီလောက် အထိ ရှိပါတယ်တဲ့။ သူ့အသိ အဝေးပြေးက တစ်ယောက်ကို ကျွန်တော် ဖုန်းဆက်မေးကြည့်တော့ ၈ နာရီဆို မရှိတော့ဘူးတဲ့။ တက္ကစီမောင်းတဲ့သူက သူလိုက်ပို့ရမလားတဲ့ တစ်ရက်ကို ပုံမှန် ၄ သောင်းခွဲယူတာ။ အကို့ကို ၄ သောင်းပဲ ယူပါ့မယ်တဲ့။ ဒီနေ့က တစ်နေကုန်လည်း မယူထားဘူး။ ညဘက်မှ စယူတာဆိုတော့ မနက်ဖြန် ပြန်လာမယ်ဆိုရင် ၇ သောင်းပဲ ယူပါ့မယ်တဲ့။ ဒါပေမယ့် သေချာအောင် အဝေးပြေးကို အရင်သွားဖြစ်ပါတယ်။
အဝေးပြေးကိုရောက်တော့ ပြည်ကားတွေ တစ်စီးမှ မရှိတော့ပါ။ ချောက်မြို့ဘက်ကို သွားတဲ့ကားကို မေးကြည့်တော့လည်း ပြည်လမ်းက မသွားပါတဲ့။ အဲဒါနဲ့ ကားငှားပြီး သွားရမလို ဖြစ်နေတုန်း ပြည်ကား တစ်စီး ရှိတယ်ဆိုလို့ အမြန်ပြေးပါတယ်။ ကားခ ၄၅၀၀၊ ကားရှာပေးတဲ့သူကို လဘက်ရည်ဖိုး ၅၀၀။ ပြည်ကားပေါ်ရောက်ပြီဆိုမှ စိတ်နည်းနည်း အေးရပါတယ်။ အဲဒီအချိန်မှ အချိန်က ည ၉ နာရီ ရှိပါပြီ။
လက်ပံတန်း စားသောက်ဆိုင်မှာ နားတော့ တခြားကားနဲ့ လိုက်လာတဲ့ ကိုသူရမျိုးတို့နဲ့ တွေ့ပါတယ်။ အခြားအဖွဲ့တွေလည်း ကားငှားပြီး လာတဲ့သူကလာ၊ ကုန်ကားနဲ့ လိုက်တဲ့သူက လိုက်။ လာနေကြတယ် ပြောပါတယ်။ ဒါနဲ့ ပြည်မှာ ဆုံမယ်။ အောင်လံကို အတူဆက်သွားကြမယ်ဆိုပြီး ဖုန်းနံပတ်တွေယူ၊ ချိန်းထားလိုက်ပါတယ်။
ပြည်ကို ဝင်ခါနီးမှာ ကိုသူရမျိုးက ဖုန်းဆက်ပါတယ်။ သူတို့ကားက ပြည်ရောက်လို့ အောင်လံသွားမယ့်ကားကို အချိန်ဆွဲပြီး စောင့်ခိုင်းထားပါတယ်တဲ့။ ကျွန်တော်စီးလာတဲ့ကားက ပြည်အဝင်မှာ အရှိန်လျှော့လိုက်လို့ ထင်ပါတယ်။ သူတို့ကားက ကျော်သွားတယ်။ ခဏနေတော့ ဖုန်းထပ်ဆက်တယ်။ အောင်လံကားက မစောင့်နိုင်တော့ဘူးဆိုပြီး ထွက်သွားလို့ လိုက်သွားပါပြီတဲ့။ အဲဒီအချိန်မှာမှ ကျွန်တော်က ပြည်ကားဂိတ်ကို ရောက်ပါတယ်။ ည ၂ နာရီလောက်ပေါ့။
ကိုသူရမျိုးက ဖုန်းထပ်ဆက်တယ်။ ကားက ခဏရပ်ပြီး ကျန်းမာရေး အချိန်ပေးထားတယ်တဲ့။ ဆိုင်ကယ်ငှားပြီး လိုက်ခဲ့ပါတဲ့။ ဒါနဲ့ ဆိုင်ကယ်အမြန်ဆုံး မောင်းနိုင်တဲ့သူ(ဂိတ်က လူတွေ ပြောလိုက်တာပဲ)ကို ငှားပြီး လိုက်ပါတယ်။ နောက်ကားက မနက် ၅ နာရီလောက်မှ ထွက်မှာဆိုတော့ ဒီကားလွတ်လို့ မရဘူးလေ။ မောင်းတဲ့သူက တော်ပါတယ်။ အရှိန်အရမ်းမြန်တာရော ရာသီဥတုနဲ့ အေးစက်နေတဲ့ လေတွေကြောင့် လူက တုန်နေပါတယ်။ အောင်လံကားကို မမီတော့ဘူးလို့ ထင်တဲ့အချိန်မှာ ရပ်ထားတဲ့ကားကို လှမ်းမြင်လိုက်ရလို့ တော်တော် ပျော်သွားပါတယ်။ ကားပေါ်ရောက်မှ စိတ်နည်းနည်း သက်သာသွားရတယ်။ ကားကို ဂိတ်မှာရော လမ်းမှာပါ အချိန်ဆွဲပေးထားတဲ့ ကိုသူရမျိုးကို ကျေးဇူးတင်ပါတယ်ဗျာ။
သရက်ကူးတို့ဆိပ်
အောင်လံကိုရောက်တော့ မနက် ၅ နာရီလောက်ရှိပြီပေါ့။ အေးစက်နေတဲ့လေတွေနဲ့ ထပ်တွေ့ပါတယ်။ စက်လှေ ခေါင်မိုးပေါ်မှာပါ။ အနွေးထည်မပါပါ။ မပါဆို အနွေးထည်ကောင်းကောင်းကို မရှိတာ။ ရန်ကုန်က ချမ်းမှ မချမ်းတာ။(အခုတော့ ချမ်းနေပြီ)
ဆီကော်(fb အထာတွေ)
သရက်မှာ ဆီကော်ဆိုတဲ့ ဆီချက်ခေါက်ဆွဲနဲ့ ကော်ရည်ရောထားတာ စားပါတယ်။ တစ်ပွဲ
၃၀၀ ပါ။ စားလို့ ကောင်းပါတယ်။ နွားနို့တိုင်ကီ တစ်ခွက်နဲ့ အီကြာကွေး
တစ်ချောင်းလည်း ဆွဲလိုက်ပါသေးတယ်။ ဘယ်အချိန်ထိ မစားမသောက်ပဲ နေရမယ်ဆိုတာ
မသိနိုင်ဘူးလေ။
Tha Yet Myo 1869 Central Jail
၈နာရီ လွှတ်မယ်၊ တော်ကြာ ၈ နာရီခွဲလွှတ်မယ်ဆိုပြီး မနက် ၆ နာရီလောက်ကနေ စောင့်မျှော်နေကြတာ ၁၀ နာရီမှာ ကိုမင်းကိုနိုင် ထွက်လာပါတယ်။
လွတ်မြောက်လာပါပြီ
ကိုမင်းကိုနိုင်
သတ္တဌာန ဘုရားနဲ့ ဆုတောင်းပြည့်ဘုရားကို သွားဖူးပါတယ်။ မီဒီယာတွေ မေးတာ မြန်းတာကို သွားရင်းနဲ့ ဖြေရပါတယ်။ အဲဒီလို ဖြေရင်းနဲ့ သရက်မြို့လူထုကို နှုတ်ဆက်ပါတယ်။
သရက်က အောင်လံအပြန်
အောင်လံကူးတို့ဆိပ်က ကြိုနေတဲ့ လူထု
သရက်၊ အောင်လံ၊ ပြည်မြို့အားလုံးမှာ လှိုက်လှိုက်လှဲလှဲ ကြိုဆိုနှုတ်ဆက်သူတွေ အများကြီးပါပဲ။ ပြည်မြို့မှာ ညဘက် လူတွေကို နှုတ်ဆက်စကားပြောနေတဲ့ ကိုမင်းကိုနိုင်ကို ဆိုင်ကယ်တွေ ကြားထဲ ဓာတ်ပုံဝင်ရိုက်ရင်း ဆိုင်ကယ်အိပ်ဇောအပူနဲ့ထိမိတဲ့ ခြေသလုံးက ဒဏ်ရာလေး အမှတ်တရယူပြီး၁၀ နာရီခွဲလောက်မှာ ပြည်၊ အောင်လံ၊ သရက် ခရီးစဉ်ကို အဆုံးသတ်ခဲ့ပါကြောင်း မှတ်တမ်းလေး ရေးလိုက်ပါတယ်ခင်ဗျာ။
